Tá an fear agus an bhean a ghabh na Gardaí inné maidir leis an tubaiste sa Chraoslach i gCo Dhún na nGall in 2022 scaoilte saor gan iad a bheith cúisithe in aon chion.
Gabhadh an bheirt, atá sna daichidí, faoin Acht um Chionta Neamh-Mharfacha in aghaidh an Duine agus ceistíodh iad in dhá stáisiún Ghardaí éagsúla i gCo Dhún na nGall.
I ráiteas, dúirt na Gardaí go bhfuil siad ag leanacht lena bhfiosrúchán faoin tubaiste agus rún acu comhad a chur chuig an Stiúrthóir Ionchúiseamh Poiblí.
Maraíodh deichniúr – ceathrar fear, triúr ban agus triúr páistí – mar gheall ar phléasc a tharla ag stáisiún peitril agus ag bloc árasán i sráidbhaile an Chraoslaigh ar an 7 Deireadh Fómhair 2022.
Nuacht agus Cúrsaí Reatha RTÉ
