Tá léirsiú ar siúl ar shráideanna chathair Malmo sa tSualainn tráthnóna.
Lucht tacaíochta na bPailistíneach ag léiriú a míshástachta faoi rannpháirtíocht Iosrael sa chomórtas Eoraifíse a tháinig amach le brait agus fógraí.
Tá conspóid mhór tarraingte sa chomórtas Eoraifíse agus daoine áirithe an-mhíshásta faoi go bhfuil Iosrael san iomaíocht.
Géaraíodh ar sin arú inné nuair a cháiligh Iosrael do sheisiún na craoibhe a gcuirfear tús leis anocht.
Níos túisce inniu thug Cónaidhm Craoltóireachta na hEorpa (EBU) le fios nach mbeidh an t-amhránaí ón Ísiltír,Joost Klein ag glacadh aon pháirt anocht sa gComórtas.
Is é an EBU a bhíonn ag eagrú an chomórtais seo atá á reachtáil i mbliana i Malmo.
Deirtear gur cuireadh an ruaig ar Klein i ndiaidh do bhean a bhí ag obair ar léiriú an chomórtais gearán a dhéanamh faoi.
Tá póilíní na Sualainne i mbun a gcuid fiosrúchán faoin ngearán agus dá réir sin shocraigh EBU nach bhféadfadh Klein a bheith páirteach anocht.
25 iomaitheoir anois a bheidh páirteach sa chomórtas mór craoibhe anocht, Bambi Thug ag déanamh ionadaíocht thar ceann na tíre seo, ina measc.
