Tháinig iarcheannaire an DUP Jeffrey Donaldson os comhair cúirte san Iúr i gCo an Dúin inniu agus cionta gnéasacha a bhaineann leis an am a caitheadh curtha ina leith.
Aon chúis déag san iomlán atá curtha ina leith.
Éigniú agus gníomh ró-mhígheanasach le leanbh is ea péire acu, agus baineann na naoi gcinn eile le hionsaí mígheanasach a dhéanamh ar bhaineannach.
Líomhnaítear go bhfuil beirt íospartach ann agus go ndearnadh na cionta ag tráthanna éagsúla idir Eanáir 1985 agus Nollaig 2006.
Tá na líomhaintí á séanadh go láidir ag Jeffrey Donaldson, atá 61 bliain d'aois, ach níor iarradh air pléadáil a dhéanamh sa chúirt inniu.
Tá a bhean chéile Eleanor Donaldson, atá 58 bliain, cúisithe i gcionta gnéasacha freisin.
Ceithre chúis maidir le cabhrú le Jeffrey Donaldson agus neartú lena chionta atá curtha ina leithse.
Tá na líomhaintí á séanadh aicise chomh maith ach – ach oiread lena fear céile – ní dhearna sí aon phléadáil fhoirmiúil sa chúirt inniu.
Scaoileadh saor an bheirt ar bannaí £350 an duine agus ordaíodh dóibh gan aon teagmháil a dhéanamh le finnéithe an ionchúisimh.
An 22 Bealtaine an chéad uair eile a thiocfas an cás os comhair na cúirte ach ní chaithfidh ceachtar den bheirt a bheith i láthair an lá sin.
Gabhadh Jeffrey Donaldson agus a bhean chéile go moch ar maidin an 28 Márta agus cúisíodh iad sna cionta gnéasacha an oíche dar gcionn.
D'éirigh sé as mar cheannaire an DUP a luaithe a cúisíodh é agus ceapadh Gavin Robinson mar cheannaire eatramhach ina áit.
Toghadh Jeffrey Donaldson mar cheannaire an DUP in 2021.
Tá sé ina fheisire parlaiminte do thoghcheantar Ghleann an Lagáin ó 1997.
Ball de Pháirt Aontachtach Uladh a bhí ann go dtí 2003 ach d'fhág sé an páirtí sin agus chuaigh sé isteach sa DUP an bhliain dar giconn.
Nuacht agus Cúrsaí Reatha RTÉ
