Maraíodh fear sna fichidí i dtimpiste bóthair a bhí i gCo Ros Comáin aréir.
Bhuail an gluaisteán a bhí an fear a thiomáint agus leoraí faoina chéile ar bhóthar an N61 siar ó Bhaile Átha Luain go gairid roimh 10 a chlog aréir.
Thug na seirbhísí éigeandála an fear chuig Ospidéal Portiuncula i mBéal Átha na Sluaighe, áit ar deimhníodh go raibh sé caillte.
Tá scrúdú teicniúil le déanamh ar láthair na timpiste inniu ag saineolaithe na nGardaí.
Is iad na Gardaí i mbaile Ros Comáin atá i mbun an fhiosrúcháin agus tá siad ag iarraidh ar aon duine a chonaic an timpiste nó a mbeadh aon eolas ábhartha eile acu teacht chun cainte leo.
Tá 55 duine maraithe ar bhóithre an Stáit ó thús na bliana, sin trí dhuine dhéag níos mó ná an tréimhse chéanna anuraidh.
Nuacht agus Cúrsaí Reatha RTÉ
