Tá buachaill 17 bliana d'aois cúisithe i ndúnmharú Tristan Sherry, a bhásaigh de bharr ionsaí gunna i mBaile Bhlainséir oíche Nollag.
Tugadh os comhair na Cúirte Dúiche i mBaile Átha Cliath é ar maidin.
Ní féidir an buachaill a ainmniú de bhrí gur mionaoiseach é de réir an dlí.
Sa chúirt ar maidin dúirt an Bleachtaire Garda Tom McCarrick ó Aonad Bleachtaireachta Bhaile Bhlainséir fianaise maidir le gabháil an ógánaigh.
Cúisíodh an buachaill i láthair a mháthar go luath maidin inniu.
Cuireadh siar faoi choinneáil é agus tiocfaidh sé os comhair Chúirt na Leanaí Dé Céadaoine seo chugainn.
Is é seo an ceathrú duine atá cúisithe ag na Gardaí maidir leis an eachtra.
Tháinig triúr fear os comhair cúirte go dtí seo, agus gabhadh fear eile 18 mbliana d'aois Déardaoin sular scaoileadh saor é gan cúiseanna a chur ina leith.
Bhásaigh Tristan Sherry, 26, nuair a rinneadh ionsaí scine air le linn ionsaí gunna i mbialann Browne's Steakhouse i mBaile Bhlainséir.
Bhásaigh Jason Hennessy, an dara fear a caitheadh san ionsaí sin, san ospidéal aon lá dhéag níos déanaí.
