Tá iarrtha ag Rialtas na hAfraice Theas ar an gCúirt Bhreithiúnais Idirnáisiúnta sa Háig ordú do na hIosraelaigh an cogadh atá siad a fhearadh ar Gaza a chur ar fionraí láithreach.
Rinneadh an t-iarratas inniu an chéad lá den chás dlí atá tugtha ag an Afraic Theas in aghaidh na nIosraelach faoin gcinedhíothú a mhaítear atá siad a dhéanamh ar Phalaistínigh Gaza.
Agus í ag labhairt sa chúirt inniu, mhaígh abhcóide Rialtas na hAfraice Theas, Adila Hassim, go raibh Airteagal 2 den Choinbhinsiún um Chinedhíothú sáraithe ag na hIosraelaigh san iamhchríoch Phalaistíneach.
Dúirt sí go bhfuil patrún córasach le feiceáil in iompar na nIosraelach in Gaza ar féidir a mhaíomh dá bhíthin gur cinedhíothú atá ar bun acu ann.
De réir an Choinbhinsiúin um Chinedhíothú a ritheadh i 1948, is é is cinedhíothú ann gníomhartha a dhéantar le rún cine, grúpa náisiúnta, grúpa eitneach nó grúpa creidimh faoi leith a scriosadh nó a dhísciú.
Dar leis an Afraic Theas go mbaineann an sainmhíniú seo le hábhar i gcás a bhfuil na hIosraelaigh a dhéanamh gach lá le trí mhí in Gaza, áit a bhfuil os cionn 23,000 duine maraithe acu – sibhialtaigh a bhformhór – gan trácht ar na scórtha míle atá donaithe acu.
Ina theannta sin, áirítear coirp 8,000 duine eile a bheith folaithe ag smionagar na bhfoirgneamh atá leagtha ag buamaí na nIosraelach.
Baineann sé le cás na hAfraice Theas freisin go bhfuil na hIosraelaigh ag coinneáil sóláthairtí riachtanacha d'aon ghnó ó na Palaistínigh.
Dar le habhcóide eile, Tembeka Ngcukaitobi, gur ag na leibhéil is airde i stát Iosrael a cothaíodh an rún Palaistínigh Gaza a dhíothú.
Tá abhcóide de bhunadh na hÉireann, Blinne Ní Ghrálaigh, ag cur comhairle ar Rialtas na hAfraice Theas faoin gcás.
Tá na hIosraelaigh lena gcás féin a leagan amach sa chúirt amárach.
Tá sé ráite acu cheana, áfach, nach bhfuil aon bhonn le cás na hAfraice Theas agus gur frith-Sheimíteachas is siocair leis.
Ní aon údarás praiticiúil ag an gCúirt Bhreithiúnais Idirnáisiúnta mar nach bhfuil aon chóras ann lena rialuithe a chur i bhfeidhm.
Nuacht agus Cúrsaí Reatha RTÉ
