Tá sé deimhnithe go raibh 2023 ar an mbliain ba theo ó cuireadh tús leis na taifid. Ar an meán, bhí an teocht 1.5 céim Celsius níb airde ná mar a bhí sí le linn na ré réamhthionsclaíche.
Léiríonn tuarascáil de chuid Copernicus, an tseirbhís de chuid an Aontais Eorpaigh a bhíonn ag plé le hathrú aeráide, gur ag tráthanna áirithe i rith 2023, go raibh an teocht dhá chéim Celsius ní ba theo ná mar a bhí sí le linn na ré réamhthionsclaíche. Lena chois sin, bhí Iúil na bliana seo caite ar an mí ba theo ó cuireadh tús leis na taifid; is amhlaidh go measann eolaithe go raibh sí ar an mí ba theo riamh le 120,000 bliain anuas.
Ina theanta sin, bhí an leibhéal muiroighir ab ísle riamh san Antartach.
14.98C a bhí mar mheánteocht i rith 2023. B'í 2016 an bhliain ba theo riamh roimhe sin, tráth a raibh an meánteocht 0.17C níb ísle.
Tá coimitmint tugtha ag an bpobal idirnáisiúnta faoi Chomhaontú Pháras gur gá téamh domhanda a choimeád faoi bhun 1.5C os cionn na meánteochta réamhthionsclaíche, chun go gcuirfear an domhan ar bhealach a leasa.
Meastar go mbaineann cuid den ardú anuraidh leis an El Nino, feiniméan aimsire nádúrtha san Aigéan Ciúin, a thug teas léi go dtí dromchla an domhain.
