Tá Státrúnaí Mheiriceá,Antony Blinken,i mbun cainteanna inniu le ceannairí sa Chatar féachaint le réiteach síochánta a fháil ar an ghéarchéim sa Mheánoirthear faoi láthair, áit a bhfuil Iosrael in adharca le Hamas agus Hezbollah.
Tá sé mar aidhm ag an státrúnaí féachaint chuige nach scaipeann an chogaíocht go forleathan sa réigiún mar atá á bhagairt le roinnt laethanta anois ó maraíodh leascheannaire Hamas sa Liobáin 5 lá ó shin.
Bhí cainteanna ag an Uasal Blinken le ceannaire na hIordáine, An Rí Abdullah, níos túisce.
Dúirt an Rí Abdullah leis go gcaithfeadh Meiriceá brú a chur ar Iosrael sos comhraic a chur i bhfeidhm láithreach i Stráice Gaza.
Beidh Antony Blinken sa réigiún as seo go ceann seachtaine agus tabharfaidh sé cuairt ar Iosrael agus ar an Bhruach Thiar i gcaitheamh an ama sin.
