Léirsigh barr ar 100 dalta ó chúig Ghaelscoil i ndeisceart Bhaile Átha Cliath taobh amuigh de Dháil Éireann inniu mar chuid d'fheachtas atá ar bun le meánscoil Ghaeilge a bhunú i scoilcheantar na bpáistí.
Tá tuismitheoirí agus daltaí i mBaile Átha Cliath 2, 4, 6, agus 8 – i gcomhar le heagraíochtaí Gaeilge – ag éileamh ar an Roinn Oideachais Gaelcholaiste a bhunú i gcóngar Ghaelscoileanna an cheantair.
Níl aon Ghaelcholáiste sa mhórcheantar sin a bhfuil 200,000 duine ina gcónaí ann.
Thángthas i dtír ar Dhaidí na Nollag in ómós na hócáide agus thug na leanaí litreacha dó ina n-achainíonn siad air tacú lena n-iarratas.
Dúirt Julian de Spáinn, Ard-Rúnaí Chonradh na Gaeilge, gur gealladh sa Chlár Rialtais líon na ndaoine óga atá i scoileanna Gaeilge faoi láthair a dhúbailt agus Gaelscoileanna agus Gaelcholáistí a bhunú in áiteanna a bhfuil éileamh mór orthu.
Tá clann Arni Haraldsson ag freastal ar Ghaelscoil Lios na nÓg i mBaile Átha Cliath 6 agus bhí siad i láthair ag an agóid taobh amuigh de Theach Laighean inniu.
"Roghnaigh mé féin agus mo pháirtí Gaeloideachas dár mbeirt pháistí i nGaelscoil Lios na nÓg", arsa sí, "agus ba mhaith linn go mbeadh siadsan ... [agus páistí eile] ... in ann leanúint lena n-aistear oideachasúil trí Ghaeilge ag an dara leibhéal inár scoilcheantar".
I ráiteas ón Roinn Oideachais tráthnóna, dúradh go bhfuil dóthain spáis sna Gaelcholáistí i ndeisceart Bhaile Átha Cliath le freastal ar an éileamh atá ann faoi láthair.
Tugadh le fios, mar sin féin, ó tharla líon na nGaelscoileanna a bheith ag dul i méid sa cheantar go bhfuiltear ag coinneáil súil ar an gcás.
Nuacht agus Cúrsaí Reatha RTÉ
