Tá Paddy Cosgrave éirithe as a ról mar phríomhfheidhmeannach ar an chomhlacht Web Summit.
Thug an fiontraí an méid sin le fios i ráiteas tráthnóna agus dúirt go raibh tuairimí pearsanta a nocht sé ag cur isteach "ar an imeacht, an fhoireann, na h-urraitheoirí, ar thionscnaimh nua dár gcuid agus ar dhaoine a bhíonn i láthair."
"Gabhaim mo leithscéal arís le aon duine ar ghoill mo ráitis air."
Inné d'fhógair Google agus Meta go raibh siad ag cuireadh deireadh lena gceangal le Web Summit nuair a cháin Paddy Cosgrave tacaíocht thíortha an Domhain Thiar do Iosrael i ndiaidh ionsaithe Hamas ar an tír sin.
Níos luaithe an tseachtain seo shocraigh Intel agus Siemens gan a bheith páirteach sa teacht le chéile teicneolaíochta is mó san Eoraip.
Tharraing bunaitheoir Y Combinator, Garry Tan, chomh maith le Ravi Gupta ó Sequoia Capital agus infheisteoirí móra caipitil eile siar as an chomhdháil freisin.
"Tuigim gur ghoill an méid a dúirt mé, an uair a dúirt mé é agus an bealach inár cuireadh i láthair é, go mór ar dhaoine," a dúirt sé ar shuíomh idirlín Web Summit. "Gabhaim mo leithscéal le aon duine a ghortaigh mo bhriathra."
Rinne sé ráitis ar an fhoréigean in Iosrael agus i nGaza an tseachtain seo caite agus arís an tseachtain seo.
Dúirt urlabhraí ó Web Summit go bhfuil sé i gceist acu Príomhfheidhmeannach nua a cheapadh chomh luath agus is féidir.
Leanfaidh comhdháil le bliana seo ar aghaidh i Lisboa na Portaingéile, mar a bhí beartaithe, a dúirt an t-urlabhraí.
