Deir an Ghníomhaireacht um Chaomhnú Comhshaoil go bhfuil siad i dteagmháil le Comhairle Co. Dhún na nGall agus le hÁisíneacht na Lochanna i dTuaisceart Éireann faoi eachtra a ba chúis le bás beagnach 1,000 iasc i sruthán in aice le Cúil na gCuirridín.
Dúirt an Ghníomhaireacht i ráiteas gur chuir an comhlacht Aurivo Foods in iúl dóibh Dé Máirt gur tharla sceitheadh de thimpiste óna monarcha ar na Croisbhealaí, amach sa tsruthán a ritheann chuig Abhainn na Finne.
Tuigtear gur dhá chiliméadar den tsruthán atá truaillithe ag an sceitheadh.
Thug an Ghníomhaireacht le fios gur cuireadh beartais i bhfeidhm le nach silfeadh cuid ar bith den sceitheadh ar aghaidh ó thuaidh chuig an Fhinn.
Bhí an bradán, an breac geal agus an eascann i measc na spéiceas éisc a maraíodh, tuigtear.
