Bhí a gcruinnithe réamh-pharlaiminte Fómhair ag na Daonlathaithe Sóisialta agus ag Páirtí an Lucht Oibre inniu, sula bhfillfidh an Dáil an tseachtain seo chugainn.
Bhí an ghéarchéim tithíochta i measc na n-ábhar a bhí faoi chaibidil ag an dá pháirtí.
Tá buiséad 2024 ar na bacáin agus tá an freasúra ag ullmhú a moltaí siúd don bhuiséad.
Deir na Daonlathaithe Sóisialta, faoi stiúir Holly Cairns, go bhfuil ré an Rialtais reatha ag teacht chun deiridh agus go bhfuil teipthe orthu dul i ngleic leis na dúshláin atá rompu.
Dúirt Holly Cairns go bhfuil sí réidh le dhul i mbun comhrialtais, tar éis an olltoghcháin.
Cúrsaí fuinnimh, tithíochta agus an costas ard maireachtála a bhí i measc na n-ábhar a pléadh ag a gcruinniú.
Bhí a gcruinniú réamh-pharlaiminte ag Páirtí an Lucht Oibre inniu chomh maith.
Léiríonn na pobalbhreitheanna nach bhfuil ag éirí go maith leis an bpáirtí mórán dul chun cinn a dhéanamh, ach deir Aodhán Ó Riordain, urlabhraí Oideachais agus Dlí is Cirt an pháirtí, gurb é "glór an pháirtí atá ag teastáil anois níos mó ná ariamh."
Pléadh an ghéarchéim tithíochta, bochtanas fuinnimh, an costas ard maireachtála agus vóta mímhuiníne na nGardaí i Drew Harris ag an gcruinniú.
Fillfidh an Dáil in athuair Dé Céadaoin seo chugainn.
