Tá beagnach 2,000 teach tábhairne dúnta sa Stát ó 2005, a deirtear i dtuarascáil úr ó scátheagraíocht ionadaíochta thionscal na dí.
Sin 22.5% de thithe tábhairne uile an Stáit, de réir na heagraíochta.
Tugtar le fios sa tuarascáil freisin gur dhún 450 tábhairne ó thús na paindéime Covid-19 – 108 acu anuraidh – agus gur tithe faoin tuath a mbunáite.
Soilsítear ann na trí chontae ba mhó ar dhún tithe tábhairne iontu ó thaobh céatadáin de le hocht mbliana déag.
Dhún 32% de thithe tábhairne i Luimneach, 29.9% i gCorcaigh agus 29.9% i Laois ó 2005.
Lena ais sin, níor dhún ach 3.4% de thithe tábhairne i mBaile Átha Cliath.
Tá tionscal na dí ag achainí ar an Rialtas tuilleadh tacaíochta a thabhairt do thábhairní beaga áitiúla agus, thar aon ní eile, an dleacht mháil a ghearrtar ar alcól a laghdú gan spás.
Ba chóir a chur san áireamh, a deir siad, go mbíonn pobail tuaithe thíos leis go mór go heacnamaíoch agus go sóisialta nuair a dhúnann tithe tábhairne áitiúla.
Téann an scéal i gcion ar a lán daoine – idir fhostóirí, oibrithe agus sholáthraithe – gan trácht ar lucht earnáil na turasóireachta, a deir tionscal na dí.
Nuacht agus Cúrsaí Reatha RTÉ
