Tá sé dearbhaithe ag an Rialtas gur féidir cóiríocht do mhic léinn a chur ar fáil d'inimircigh feasta má tá an chóiríocht sin díomhaoin ar feadh bliana.
Moladh a leithéid i gcás ionad cóiríochta do mhic léinn i gCo Shligigh le deireanas, ach caitheadh an plean sin i gcártaí nuair a chuir polaiteoirí áitiúla ina choinne agus nuair a tháinig sé chun solais go raibh easaontas faoi idir an Roinn Lánpháirtíochta agus an Roinn Breisoideachais agus Ardoideachais.
Tá an dá Roinn Rialtas sin tar éis mórtachas a dhéanamh le chéile agus tá siad ar aon intinn anois gur féidir feasta lóistín do mhic léinn atá díomhaoin ar feadh dhá mhí dhéag nó níos faide a chur ar fáil d'inimircigh.
Ina cheann sin, aontaíodh go dtabharfaí ar ais do mhic léinn san fhómhar aon lóistín a chuirfí ar fáil d'inimircigh i gcaitheamh an tsamhraidh.
Faoi láthair, tá 5,000 leaba do mhic léinn i mbreis agus 20 coláiste ar fud na tíre tógtha ag dídeanaithe.
Dúirt an tAire Breisoideachais agus Ardoideachais Simon Harris gur den riachtanas é an lóistín sin a thabhairt ar ais do na mic léinn faoi thús na bliana acadúla.
Thug an Taoiseach Leo Varadkar le fios gur socrú praiticiúil agus stuama a bhí sa phlean úr.
Nuacht agus Cúrsaí Reatha RTÉ
