Tuairiscítear gur báthadh 41 imirceach nuair a chuaigh a mbád síos amach ó oileán Lampedusa sa Mheánmhuir.
Is leis an Iodáil an t-oileán ach is gaire don Túinéis é.
Tuigtear gur ó chalafort Sfax in oirthear na Túinéise a sheol an bád agus gur ag tabhairt aghaidh ar Lampedusa, nó áit éigin eile san Iodáil, a bhí sí nuair a chuaigh sí síos.
Deirtear gur tháinig ceathrar slán – triúr fear agus bean – arb as an an gCósta Eabhair agus as an nGuine in iarthar na hAfraice iad.
Lastlong a tharrtháil an ceathrar agus cuireadh iad faoi chúram Gharda Cósta na hIodáile ina dhiaidh sin.
Níl sé soiléir fós an bhfuil aon bhaint ag an scéal le tuairiscí a bhí ann Dé Domhnaigh seo caite faoi dhá bhád a dúradh a chuaigh síos sa limistéar céanna.
Bhí tuairisc eile fós ann ar an Domhnach gur báthadh os cionn leathchéad imirceach amach ó Sfax.
De réir figiúirí atá curtha ar fáil ag Rialtas na hIodáile, tá thart ar 93,700 imirceach tagtha ar bháid chun na hIodáile go dtí seo i mbliana, i gcomparáid le 44,700 san achar céanna anuraidh.
Nuacht agus Cúrsaí Reatha RTÉ
