Tá an chuideachta Accenture tar éis fógairt go bhfuil siad chun 890 duine a ligean chun siúil as a gcuid postanna.
Sin 14% den 6,500 atá fostaithe acu sa tír.
Mí an Mhárta d'fhógair Accenture go raibh siad chun fáil réidh le 2.5% den líon atá fostaithe go domhanda acu.
Cheana féin i mbliana tá 1,300 duine ligthe chun siúil ag an gcuideachta in Éirinn - 400 díobh ar chlár iomaíochta.
Tá an chuideachta seirbhísí buailte go dona ag an ngearradh siar atá déanta le bliain anuas ag mórchuideachtaí teicneolaíochta ar nós Meta (Facebook mar a bhíodh) atá tar éis ⅓ú cuid dá meitheal a ligean chun bealaigh.
Tá na mílte fostaí ag Accenture ach iad ag feidhmiú mar a bheadh seachfhoinsithe – curtha amach ag obair ar chonradh – le ollchuideachtaí teicneolaíochta cosúil le Meta agus Microsoft.
Cuireann Accenture seirbhísí ar fáil freisin do bhancanna, eagrais stáit agus mórchuideachtaí tionsclaíochta agus cógaisíochtaí ar fud na cruinne.
Inniu a cuireadh foireann oibre na hÉireann ar an eolas faoin gciorrú ar phostanna.
Deir Accenture nach bhfuil sé i gceist acu an gearradh siar a phlé go poiblí go mbeidh comhráití críochnaithe leis an meitheal faoi chlár iomarcaíochta.
Deir siad go bhfuil siad dírithe go fóill ar fhreastal ar a gcuid custaiméirí agus go bhfuil siad lán-dáiríre i gcónaí faoina ngnó in Éirinn.
