Tá leithscéal gafa ag na póilíní sa Tuaisceart le ceithre fhear déag ar tugadh íospairt dóibh nuair a gabhadh iad corradh le leathchéad bliain ó shin.
Bhí na fir i measc na gcéadta a ghabh Arm na Breataine nuair a tugadh isteach an t-imtheorannú sa Tuaisceart i mí Lúnasa 1971.
Cé gur saighdiúirí a ghabh na fír ba saighdiúirí agus póilíní araon a cheistigh iad.
Agus iad faoi choinneáil i mbeairic Bhaile Uí Cheallaigh i gCo Dhoire, imríodh díothú céadfach ar na fir.
Tarraingíodh cochaill anuas ar a gcloigne, fágadh gan uisce agus bia iad agus níor ligeadh dóibh codladh a dhéanamh.
Dhá bhliain go leith ó shin, rialaigh Cúirt Uachtarach na Breataine go raibh sé mícheart ag na póilíní gan fiosrúchán a chur sa siúl faoin gcaoi ar caitheadh leis na fir, a dtugtar "Fir na gCochall" orthu go minic.
Rialaigh an chúirt i mí na Nollag 2021 go raibh cinneadh na bpóilíní gan an scéal a fhiosrú bunaithe ar thuarascáil a bhí "fíorlochtach" agus nár chóir aon ghlacadh a bheith leis.
Rialaigh an Chúirt Eorpach um Chearta an Duine i 1978 agus arís in 2018 nach céasadh a bhí sa drochíde a tugadh do na fir.
Malairt tuairime, áfach, a thug Cúirt Uachtarach na Breataine a rialaigh in 2021 go raibh sé de cheart céasadh a thabhairt air i dtéarmaí an lae inniu.
Cailleadh duine de na ceithre fhear déag, Joe Clarke, inné ach ghabh na póilíní leithscéal leis Déardaoin seo caite agus é ar leaba a bháis.
Ghabh ardchonstábla na bpóilíní Simon Byrne leithscéal leis na fir atá fós ina mbeatha nuair a bhuail sé leo i mBéal Feirste ar maidin inniu.
Dúirt aturnae na bhfear Darragh Mackin go bhfuil sé in am anois ag Roinn Cosanta agus Rialtas na Breataine leithscéal a ghabháil lena chuid cliant chomh maith.
Nuacht agus Cúrsaí Reatha RTÉ
