Tá aon duine dhéag gafa ag na póilíní sa Tuaisceart maidir leis an iarracht a rinneadh ar bhleachtaire sinsearach a mharú i gCo Thír Eoghain trí mhí ó shin.
Lámhachadh John Caldwell roinnt uaireanta taobh amuigh d'ionad spóirt agus áineasa san Ómaigh ar an 22 Feabhra.
Gortaíodh go han-dona é ach tá sé ag teacht chuige féin ó shin.
Creideann na póilíní gurb é an grúpa dá ngairtear an tIRA Nua i gcomhar le drong coireachta a bhí freagrach as an ionsaí lámhaigh.
Naonúr fear agus beirt bhan idir 21 bliain agus 72 bliain d'aois atá san aon duine dhéag a gabhadh ar maidin.
Is san Ómaigh agus in Oileán an Ghuail a gabhadh iad, agus tá siad á gceistiú i mBéal Feirste faoi Acht Sceimhlitheoireachta na Breataine.
Nuacht agus Cúrsaí Reatha RTÉ
