Tá fear sna seascaidí gafa ag na Gardaí maidir le fiosrúchán atá ar bun acu faoi dhuine d'fhoireann imscrúdúcháin Choimisiún Ombudsman an Gharda Síochána a bheith i láthair ag cóisir a reáchtáladh ar son Gerard Hutch an tseachtain seo caite.
Gardaí ón mBiúró Náisiúnta um Imscrúdú Coiriúil a ghabh an fear ar amhras gur sceith sé faisnéis. Chuardaigh na Gardaí teach cónaithe an fhir freisin.
Fuarthas Gerard Hutch neamhchiontach Dé Luain seo caite i ndúnmharú David Byrne a lámhachadh in Óstán an Regency i dtuaisceart Bhaile Átha Cliath in 2016 agus reáchtáladh an chóisir an oíche sin leis an bhfíorasc a cheiliúradh.
Is féidir an fear a gabhadh inniu a choinneáil ar feadh ceithre huaire fichead sula gcaithfear é a chúisiú nó a scaoileadh saor.
Tuigtear go raibh an t-imscrúdaitheoir a d'fhreastail ar an gcóisir ina phóilín i dtír eile taobh amuigh den Eoraip sular fostaíodh é i gCoimisiún Ombudsman an Gharda Síochána.
Bhí seomra ar cíos aige i dteach gar don áit a raibh cónaí ar ghaol le Gerard Hutch.
Chuir na Gardaí agallamh ar an bhfear i dtús na seachtaine seo, tráth a dheimhnigh sé go raibh sé ag an gcóisir a bhí ar siúl i dteach i mBaile Átha Cliath.
Tá an fear éirithe as an gCoimisiún ó tháinig an scéal chun solais, agus tá na Gardaí ag scrúdú a chuid taifead digiteach agus ag breathnú siar ar imscrúdúcháin a raibh sé bainteach leo san am a caitheadh.
Nuacht agus Cúrsaí Reatha RTÉ
