Bhronn Príomh-Aire na Breataine Rishi Sunak gradam ar maidin inniu ar bhuachaill sé bliana d'aois as Béal Feirste as ucht a chuid feachtasaíochta maidir le deonú orgán sa Tuaisceart.
Tá Dáithí Mac Gabhann ar an liosta le haistriú croí a fháil le cúig bliana.
Ach chuir an tsáinn pholaitiúil i Stormont moill ar leasuithe sa dlí a bhaineann le deonú orgán sa Tuaisceart.
I mí Feabhra i mbliana, shocraigh Rialtas Londan an bille a reáchtáil trí pharlaimint Westminster seachas é a fhágáil faoi Thionól Stormont.
Cinnteoidh an bille go mbeidh daoine sa Tuaisceart ina ndeontóirí orgán go huathoibríoch i ndiaidh a mbáis, ach amháin sa chás go ndearbhóidh siad go sonrach nach mian leo a bheith páirteach sa chóras.
I dteach ósta i mBéal Feirste ar maidin, bhronn Príomh-Aire na Breataine Rishi Sunak teastas 'Lóchrann Solais' ar Dháithí mar aitheantas ar a fheachtas leis an dlí a bhaineann le deonú orgán a leasú.
I dtvuít a d'fhoilsigh sé, dúirt Rishi Sunak gur duine eisceachtúil é Dáithí agus go sábhálfaidh Dlí Dháithí, mar a thugtar air, beatha dhaoine.
I litir a chuir sé chuig Daithí níos luaithe, dúirt an Príomh-Aire go raibh an gasúr sé bliana d'aois ag cuidiú le daoine eile atá cosúil leis fóirithint riachtanach a fháil.
Dúirt athair Dháithí, Máirtín Mac Gabhann, go bhfuil súil ag an teaghlach go spreagfaidh an phoiblíocht a tharraingeoidh an teastas aitheantais seo ó Rishi Sunak, go spreagfaidh sé an pobal lena macnamh a dhéanamh faoi dheonú orgán.
"Tá muid i gcónaí ag iarraidh comhrá a spreagadh i dteaghlaigh agus tá súil againn nuair a bheas daoine ag éisteacht agus ag amharc ar Dháithí ag fáil na duaise seo, go smaoineoidh siad gur cheart dóibh a bheith ina ndeontóirí organ", arsa Máirtín.
Tiocfaidh an dlí úr i bhfeidhm i mí an Mheithimh.
Nuacht agus Cúrsaí Reatha RTÉ
