Tá Uachtarán na Stát Aontaithe Joe Biden i gCuaille, Co Lú, tráthnóna, mar ar thug sé cuairt ar Chaisleán Chairlinn – dún Normannach ag bun Shliabh Feá – i gcuideachta an Tánaiste Micheál Martin.
B'as Co Lú sin-seanathair an Uachtaráin agus seo an tríú sciuird aige ar an gcontae ó 2016.
Agus gluaisteán an Uachtaráin ag déanamh a bealaigh trí bhaile Chairlinn, chuir na céadta duine fáilte feadh an bhóthair roimh fhionnó duine dá gcuid féin.
As Cairlinn, chas an tUachtarán Biden siar agus thug sé a aghaidh ar Dhún Dealgan, áit a bhfuil fáilte chroíúil eile i ndán dó.
Níos túisce tráthnóna, tar éis dó Béal Feirste a fhágáil, tháinig an tUachtarán Biden go hAerfort Bhaile Átha Cliath, mar ar chuir an Taoiseach Leo Varadkar fáilte roimhe.
Bheannaigh Joe Biden chomh maith do dhaoine eile a bhí bailithe san aerfort lena fheiceáil ainneoin na drochaimsire.
Bhí cruinniú faoi leith aige ann freisin le foireann Ambasáid na Stát Aontaithe agus a dteaghlaigh, agus labhair sé chomh maith le hoibrithe ó sheirbhís dóiteáin an aerfoirt.
Chuir an aimsir eang sa roth aige, áfach – nó eang sa rótar ba chirte a rá – mar b'éigean dó aghaidh a thabhairt ar Cho Lú ina ghluaisteán treisithe seachas ar héileacaptar mar a bhí beartaithe.
Nuacht agus Cúrsaí Reatha RTÉ
