Tá maoiniú do Phlean Teanga i gCathair Saidhbhín, Co Chiarraí, ceadaithe.
€80,000 sa bhliain ar feadh tréimhse seacht mbliana a chuirfidh Foras na Gaeilge ar fáil chun an plean a chur i bhfeidhm.
Tá Cathair Saidhbhín, atá buailte le Gaeltacht Uíbh Ráthaigh, i measc sé bhaile dhéag a bhfuil stádas mar Bhaile Seirbhíse Gaeltachta bronnta orthu.
Is é Aire Stáit na Gaeltachta Patrick O'Donovan a sheol an plean teanga i gCathair Saidhbhín ar maidin.
Ta plean teanga á chur i bhfeidhm sna ceantair Ghaeltachta ar leithinis Uíbh Ráthaigh cheana féin.
Deir Julianne McGillicuddy, cathaoirleach Chathair Saidhbhín le Gaeilge, go gcabhróidh an plean nua go mór leis an nGaeilge a chur chun cinn sa bhaile, rud a raghaidh chun leasa phobal na Gaeltachta a dheineann a gcuid gnó ar an mbaile chomh maith:
"Táimid ag iarraidh a bheith ag obair leis an earnáil gnó ionas gur féidir le daoine a gcuid gnó a dhéanamh trí Ghaeilge.
"Chomh maith leis sin táimid ag iarraidh deiseanna sóisialta a thabhairt do dhaoine an Ghaeilge atá acu a úsáid.
"Tá sé i gceist againn a bheith ag obair leis na scoileanna, an bhunscoil atá anseo againn agus an mheánscoil, Coláiste na Sceilge, áit a bhfuil Aonad Lán-Ghaeilge."
Tá maoiniú ceadaithe ag Foras na Gaeilge do phleananna teanga i sé cinn desna Bailte Seirbhíse Gaeltachta go dtí seo agus tá maoiniú le haghaidh dhá bhaile eile ceadaithe ag Údarás na Gaeltachta go dtí seo.
Dúirt Príomhfheidhmeannach Fhoras na Gaeilge Seán Ó Coinn go bhfuil an plean atá dréachtaithe ag coiste áitiúil Chathair Saidhbhín críochnúil agus cuimsitheach.
"Cé gur ceantar lag Gaeltachta é, sa mhéid agus go bhfuil sé faoi bhrú ó phobal an Bhéarla ar gach taobh, tá daoine iontacha sa cheantar seo a bhfuil dúthracht iontach iontu i dtaca leis an nGaeilge." a dúirt sé.
Bainfear leas as an maoiniú de 80,000 euro in aghaidh na bliana chun pleanálaí teanga agus cúntóir pleanála teanga a fhostú.
Deir an coiste áitiúil go gcuirfear tús leis an bpróiseas earcaíochta chomh luath agus is féidir.
Nuacht agus Cúrsaí Reatha RTÉ
