Tá sé fógartha ag an ollchomhlacht teicneolaíochta Google go bhfuil siad le 240 oibrí in Éirinn a ligean chun siúil.
Sin thart ar 4.4% de na 5,500 duine atá fostaithe ag Google sa tír seo.
Cuireadh an scéal in iúl i ríomhphost don fhoireann inniu, agus dúradh leo go gcuirfí tús amárach le "comharphróiseas comhairliúcháin".
Tugadh le fios gur ó na rannóga díolacháin, teicneolaíochta agus innealtóireachta, agus tacaíochta a ligfí na oibrithe chun siúil.
An mhí seo caite, d'fhógair Alphabet – máthairchomhlacht Google – go raibh siad 12,000 post in áiteanna éagsúla ar fud an domhain "a chur ar ceal".
Ag an am, dúirt Sundar Pichai, príomhfheidhmeannach Alphabet, go raibh sé dóchasach faoina raibh i ndán don chomhlacht a bhuíochas sin don infheistíocht a rinne siad in Intleacht Shaorga i bhfíorthús a forbartha, i measc rudaí eile.
Mar sin féin, tá an earnáil teicneolaíochta sna Stáit Aontaithe ag cúlú agus tá oibrithe á ligean chun siúil ag na comhlachtaí is mó san earnáil le roinnt míonna – leithéidí Twitter, Meta, Stripe, Amazon, Intel, Microsoft, Google, Salesforce, PayPal agus HubSpot a bhfuil ionaid acu ar fad in Éirinn.
Ina ainneoin sin, deir an Rialtas go bhfuil bonn láidir faoin earnáil teicneolaíochta sa tír seo i gcónaí.
Nuacht agus Cúrsaí Reatha RTÉ
