Tá rún ag Cumann Altraí agus Ban Cabhrach na hÉireann agus SIPTU iarraidh ar a gcuid ball vótáil ar ghníomhaíocht thionsclaíoch in dhá ionad atá á riar ag Feidhmeannacht na Seirbhíse Sláinte ar an Chlochán in iarthuaisceart Chontae na Gaillimhe.

Níor éirigh le hionadaithe ó na ceardchumainn agus bainisteoirí ón Fheidhmeannacht teacht ar chomhréiteach i gcomhráite a bhí ar siúl acu inné faoi choimirice an Choimisiúin um Chaidreamh san Áit Oibre.

Baineann an t-aighneas tionsclaíoch le cúrsaí uainchlár agus soláthar seirbhísí in Ospidéal Ceantair an Chlocháin agus in Aonad Altranais Pobail Naomh Anna atá suite taobh leis an ospidéal.

Cuireann na ceardchumainn i leith lucht na Feidhmeannachta go bhfuil siad dúnárasach maidir lena bhfuil beartaithe acu don ospidéal.

Druideadh an t-ospidéal ar maidin inné agus tá sé tugtha le fios ag an Fheidhmeannacht go n-osclófar arís é ar maidin Dé Luain seo chugainn.

Díth foirne is cúis leis an ospidéal a bheith á dhruidim ar feadh ceithre lá, a dúradh.

I ráiteas ón Fheidhmeannacht, dúradh go bhfuil sealanna oibre breise curtha isteach ag foireann an ospidéil le gairid le bearnaí cúraim a líonadh sna seirbhísí faoisimh agus téarnaimh agus go gcaithfear na laethanta sin a chúiteamh leis na hoibrithe as seo go ceann roinnt laethanta.

Tá imní sa cheantar, ámh, nach gcomhlíonfar an gealltanas an t-ospidéal a oscailt arís.

Tá Brendan O'Malley as Sraith Salach ina measc siúd a fuair scéal ón Fheidhmeannacht tráthnóna arú inné go gcaithfidís a ndaoine muinteartha a thabhairt amach as an ospidéal ar maidin lá arna mhárach.

Tá máthair Brendan - Barbara, atá 96 bliain d’aois - ag baint leas as seirbhísí faoisimh agus téarnaimh Ospidéal Ceantair an Chlocháin.

Brendan O'Malley, Sraith Salach

Tá Brendan ar dhuine de na daoine chomh maith a chreideann go bhfuil rún ag an Fheidhmeannacht an t-ospidéal a fhágáil druidte.

"An bhfuil siad ag magadh orainn? Tá sé soiléir go bhfuil siad ag iarraidh an t-ospidéal a dhúnadh le fada. Níl siad ag ligean aon othair isteach ann níos mó agus ní bheidh ospidéal ann mura bhfuil othair ann," arsa sé.

Bhí 700 duine i láthair ag cruinniú poiblí sa Chlochán i mí Mheán Fómhair nuair a fógraíodh go mbeifí ag cur deireadh leis an tseirbhís faoisimh agus go mbeadh ar othair taisteal 80 ciliméadar chuig an ionad faoisimh i bPáirc Mhuirlinne i nGaillimh.

Os a choinne sin, dúirt an Teachta Dála Éamon Ó Cuív ó Fhianna Fáil nach gcreideann sé go bhfuil bunús ar bith leis an tuairimíocht i leith a bhfuil ar intinn ag Feidhmeannacht na Seirbhíse Sláinte.

Dar leis gur ábhar dóchais tús a bheith curtha ag an Fheidhmeannacht le feachtas earcaíochta ar leith atá dírithe ar fhoireann a aimsiú d’Ospidéal an Chlocháin agus creideann sé, a dúirt sé, go mbeidh na seirbhísí ar fáil arís ar maidin Dé Luain.

Tá an comhairleoir contae áitiúil Eileen Mannion ó Fhine Gael, áfach, ag éileamh ar an Fheidhmeannacht an gealltanas go n-osclófar an t-ospidéal arís a dhaingniú.