Tá an dealbhóir, ealaíontóir agus údar cáiliúil Clíodna Cussen tar éis bháis agus deich mbliana agus ceithre scór caite aici.
B'as an gCaisleán Nua i gCo Luimnigh í Clíodna Cussen ó dhúchas agus chuaigh sí chuig an ollscoil i mBaile Átha Cliath agus i bhFlórans.
Is i mBaile Átha Cliath a chaith sí an chuid is mó dá saol, áit ar chruthaigh sí saothair ealaíne a bhain clú agus cáil náisiúnta agus idirnáisiúnta amach i gcaitheamh na mblianta.
Thar aon ní eile, is iad na dealbha cré-umha agus cloch a mhúnlaigh agus a shnoigh sí is mó a fhágann sí le huacht ó tá a lán acu crochta in áiteanna poiblí ar fud na tíre.
Áirítear ina measc an Chloch Fhada i gceantar Shráid an Phiarsaigh i mBaile Átha Cliath, Cé a Rinne an Domhan? i nDroichead na Dothra agus an dealbh de Naomh Pádraig i Mám Éan i gConamara.
Scríobh sí leabhair ar ábhair ilghnéitheacha, léithéidí Inniu an Luan (1987); Soraidh Slán, a ghnóthaigh duais an Oireachtais (1993); Teacht na nGael go hÉirinn, athinsint ar imeachtaí Mhic Mhíle as Leabhar Gabhála Éireann (1995); Sifíní, bailiúchán filíochta (2001); Cath Chluain Tarbh (2003); Ar Dheisiúr na Gréine (2006) a bhuaigh duais an Oireachtais; agus An Eochair (2014).
Is í féin, ar ndóigh, a dhear na léaráidí dá saothair litríochta.
Bhí Clíodna Cussen pósta le bunaitheoir an chomhlachta foilsitheoireachta Coiscéim, an staraí Pádraig Ó Snodaigh, agus bhí seisear clainne acu.
