Tá an Príomhoifigeach Leighis, an Dochtúir Tony Holohan ag éirí as a ról mar phríomhoifigeach leighis sa Roinn Sláinte chun tús a chur le ról nua mar Ollamh i gColáiste na Tríonóide.
Fógraíodh inniu go gcuirfidh an Dochtúir Tony Holohan tús le ról nua mar Ollamh le Straitéis Shláinte agus Ceannaireacht ag Coláiste na Tríonóide i mBaile Átha Cliath.
Ceapadh an Dochtúir Tony Holohan ina leas-phríomhoifigeach leighis i 2001 sara thosnaigh sé sa ról mar phríomhoifigeach leighis i Mí na Nollag 2008.
Bhain sé cáilíocht amach mar dhochtúir ag Ospidéal Ollscoile Bhaile Átha Cliath i 1991.
Le déanaí, bhí sé ina chathaoirleach ar an bhFoireann Náisiúnta Éigeandála Sláinte Poiblí a chuir comhairle ar an Rialtas maidir le paindéim Covid-19.
I ráiteas, dúirt an Dochtúir Tony Holohan gur pribhléid mhór a bhí ann do a bheith ina phríomhoifigeach leighis agus deis a bheith aige a bheith bainteach le habháir ríthábhachtacha maidir le sláinte mhuintir na hÉireann.
Ghabh sé buíochas le gach duine a bhí ag obair leis.
Ghabh an Taoiseach Micheál Martin buíochas le Tony Holohan as an obair iontach atá déanta aige le 20 bliain anuas.
