Cuirfear deireadh ag meánoíche leis an maolú a bhí i bhfeidhm ar stádas na Gaeilge sna hInstitiúidí Eorpacha.
Beidh an Ghaeilge ar chomhchéim le teangacha oifigiúla eile an Aontais Eorpaigh feasta.
Is ar an 1ú Eanáir 2007 a tugadh stádas oifigiúil agus oibre don Ghaeilge ach bhí socrú maolaithe i bhfeidhm ó shin i leith, mar gheall ar an nganntanas foirne aistriúcháin, a chuir srian ar an méid ábhair a haistríodh go Gaeilge.
Dúirt Aire Stáit na Gaeltachta, Jack Chambers gur céim ríthábhachtach do thodhchaí na Gaeilge, deireadh a bheith tagtha leis an maolú ar stádas na Gaeilge.
Dúirt sé go raibh an Ghaeilge anois ar chomhchéim le teangacha oifigiúla eile an AE agus go ndaingeoidh sé an caidreamh idir an saoránach agus na córais riaracháin Eorpacha.
In éineacht le hAcht na dTeangacha Oifigiúla, a shínigh Uachtarán na hÉireann an tseachtain seo caite, tá ról na Gaeilge sna córais riaracháin náisiúnta agus Eorpacha treisithe go mór a dúirt an tAire Chambers.
