Sa Dáil inniu, cháin an Teachta Pádraig Mac Lochlainn ó Shinn Féin an méid a dúirt an Tánaiste Leo Varadkar faoi chúiteamh do dhaoine a bhfuil a dtithe millte ag brící lochtacha míoca agus piríte.
Bhí sé le rá ag Leo Varadkar inné gurb iad cáiníocóirí na tíre ar deireadh a íocfas an éiric agus a sheasfas an costas.
Chuir Pádraig Mac Lochlainn i leith Leo Varadkar gur ag seanmóireacht le daoine atá ag fulaingt de bharr na faidhbe a bhí sé.
Mhaolaigh an Tánaiste an chaint sin inniu, á rá nach ag cur cúitimh iomláin as an áireamh a bhí sé.
Tá an Rialtas le cinneadh a dhéanamh faoi chúiteamh iomlán seachtain ó amárach - an lá deireanach den mhí - ach tá lucht feachtais i nDún na nGall amhrasach agus ar tinneall.
Mhaígh Michael Doherty ón Ghrúpa Gníomh Míoca i nDún na nGall gur mór an difríocht idir an méid a tháinig ó chroí an Tánaiste inné agus óna chloigeann inniu.
Dúirt sé go bhfaca an Tánaiste lena shúile féin an damáiste a rinneadh do thithe nuair a thug sé cuairt ar Inis Eoghain.
Ar an drochuair, a dúirt an Dochartach, ní hí seo an chéad uair ag Leo Varadkar a bheith ag dul siar is aniar anonn is anall faoin gceist.
Ar stáisiún raidió Highland Radio i nDún na nGall ar maidin, dúirt an Teachta Dála Joe McHugh ó Fhine Gael, áfach, nach raibh ann ach gur ag fanacht le scéala ó Fianna Fáil a bhí an Tánaiste.
Mhaígh sé go bhfuil Leo Varadkar ag fanacht leis an tuairisc dheireanach faoin scéal ón Aire Tithíochta Darragh O'Brien.
Dúirt an tAire Caiteachais Phoiblí Michael McGrath ó Fhianna Fáil go bhfuil súil aige go gcuirfear dlús leis an scéim chúitimh 90% atá ann faoi láthair.
Tá léirsiú mór eile i mBaile Átha Cliath coicís ón Aoine seo chugainn á bheartú ag an Ghrúpa ar son Cúitimh 100%, mura dtiocfaidh dea-scéala idir an dá linn.
