Tá an t-údar, file agus léirmheastóir mór le rá Séamus Deane tar éis bháis. Bhí sé 81 bliain d'aois.
B'as Doire Séamus Deane agus bhí sé ar scoil i gColáiste Cholm Cille sa chathair sin, mar a raibh sé in aon rang le Séamus Heaney.
Bhí baint mhór ag Séamus Deane le compántas Field Day. Bhí sé ar dhuine de na hintleachtóirí a scríobh paimfléidí polaitiúla agus cultúrtha do Field Day sna 1980í agus 1990í in éineacht le leithéidí Declan Kiberd, Tom Paulin agus Terry Eagleton.
Ba é a bhí ina eagarthóir ginearálta ar cheithre imleabhar an Field Day Anthology of Irish Writing ina n-áirítear os cionn 4,000 leathanach agus a foilsíodh de réir a chéile ó 1990.
Bhain sé cáil idirnáisiúnta amach ina dhiaidh sin faoina úrscéal Reading in the Dark atá bunaithe ar bhlianta a óige i nDoire.
Bhásaigh Séamus Deane san ospidéal inné.
Dúirt an tUachtarán Michael D Higgins gur caillteanas domheasta é bás Shéamuis Deane don scríbhneoireacht in Éirinn.
