Curach ársa lámhdhéanta agus tine tugtha di ar mhaithe na healaíne - sin ceann dos na radharcanna suaithinseacha a bheidh le feiscint ag Féile Litríochta Imram.
'Crann' is teideal don scannán ealaíonta ina bhfuil ceol nuachumtha agus filíocht mar inspioráid aige.
Tá an scannán bunaithe ar an ndán ‘Tree’ a chum an file Richard Berengarten agus atá aistrithe go Gaeilge ag Gabriel Rosentstock.
I measc na radharcanna atá sa bhfís chruthaitheach, tá curach thraidisiúnta na Bóinne á déanamh ag Holger Lonze, saor báid ó Uíbh Ráthach í gCiarraí.
I gcor drámatúil sa bhfís, deintear an churach a chur trí thine fé scáth na Sceilge agus í ar snámh ar an bhfarraige.
Laura Hilliard atá ina stiúrthóir ar an scannán agus tá ceol curtha leis an ndán ag an gcumadóir Nick Roth.
Tá an fhilíocht á canadh ag Michelle O’Rourke, Caitríona O’Leary agus Olesya Zdorovetska.
Beidh an première domhanda ag ‘Crann’ ar siúl ar líne ag 8 a chlog oíche Dé Luain seo chugainn agus é mar chuid d'fhéile Imram, an fhéile litríochta Gaeilge.
