Tá Joe Biden chun tosaigh ar an Uachtarán Reatha Donald Trump i Georgia agus i Pennsylvania.
Tuairiscíonn Edison Research go bhfuil Joe Biden chun tosaigh ar Donald Trump i Georgia agus comhaireamh déanta ar nach mór 99% de na votaí ann.
Má thugann Joe Biden Georgia leis ní bheidh dóthain vótaí ag Donald Trump chun an Teach Bán a bhaint amach.
Tá sé ráite ag oifigigh i Georgia áfach go bhfuil gach seans ann go mbeidh athchomhaireamh i Georgia mar go bhfuil cúrsaí chomh teann sin.
Tá Biden chun tosaigh ar éigean i Nevada agus in Arizona chomh maith.
Tá ríomhphost seolta ag feachtas Trump go dtí a lucht tacaíochta ag rá 'Níl an toghchán seo thart'.
270 vóta coláiste toghcháin atá ag teastáil chun an Teach Bán a bhaint amach.
Faoi láthair, tá 253 ag Joe Biden agus 214 atá ag a chéile comhraic, an t-uachtarán reatha,Donald Trump ón bpáirtí Poblachtach.
Lucht agóide ag maíomh nach bhfuil cothrom na féinne á fháil ag Trump
Tá neart conspóide tarraingte ag torthaí áirithe, mar a bhíothas ag súil leis.
Tá lucht tacaíochta Donald Trump den bharúil go bhfuil roinnt de na vótaí a caitheadh, neamhbhaillí.
Maíonn Donald Trump féin, gan aon fhianaise mar chrann taca, mura gcomhairtear ach na vótaí atá dleathach, gur aigesan a bheidh toghchán na hUachtaránachta.
Ag labhairt leis na meáin sa Teach Bán tráthnóna aréir, dúirt an tUachtarán Trump nach bhfuil sé i gceist aige géilleadh do Biden
.
An baol ann go dtarraingeoidh conspóid seo na vótaí,ainriail agus achrann
'Ach is léir' a dúirt sé 'go bhfuil caimiléireacht ar bun leis an toghchán seo agus iarracht á déanamh é a ghoid uaim'.
'Is í an aidhm atá anois agam, ionracas an toghcháin seo a chosaint' arsa an t-uachtarán reatha.
Thug sé le fios go rachadh sé chun dlí ar mhaithe le stáit áirithe a bhuachan, agus toradh an toghcháin a athrú ina fhábhar.
'Bhí mé chun cinn i dtús ama' a dúirt an milliúnaí gnó as Nua Eabhrac, 'anois tá an farasbarr a bhí agam á ídiú diaidh ar ndiaidh'.
'Seo mírialtachtaí sa chóras vótála' a dúirt sé 'agus is caimiléireacht atá ar bun lena chinntiú go gcaillfidh mé an toghchán'.
Mar chontrárthacht ar sin, d'iarr Joe Biden ar dhaoine a bheith sócúil, foighneach.
Tá seisean anois dóchasach gurb é a bheidh ina 46ú Uachtarán ar Stáit Aontaithe Mheiriceá (SAM).
Thug sé aitheasc níos túisce sa bhaile a bhfuil cónaí air,Wilmington, Delaware.
Joe Biden ag labhairt le lucht leanúna
77 bliain d'aois atá Biden, agus tuigtear nach dteastaíonn uaidh anois ach 2 stát ar a mhéid leis an Teach Bán a bhaint amach.
Bheadh ar Trump (74 bliain) anois roinnt mhaith stát a bhuachan, agus tuigtear nach dócha go dtarlóidh sé sin.
Tuigtear go láidir go mbuafaidh Biden stáit Nevada agus Arizona, agus go bhfuil an bhearna idir é féin agus Trump i Pennsylvania agus an Georgia á laghdú i gcónaí.
Má éiríonn le Biden Pennsylvania a chrochadh leis deirtear, is eisean a bheidh sa Teach Bán
