Tá sé deimhnithe ag na Ranna Sláinte ar an oileán gur 214 duine atá tar éis an víreas corónach a tholgadh, - 169 ó dheas agus 45 ó thuaidh.
40 cás atá deimhnithe sa bPoblacht le 24 uair a chloig, 23 fear agus 17 bean.
Go tíreolaíoch, an taobh thoir den tír atá 25 de na cásann nua, 9 gcás an taobh thiar, agus 6 cinn sa deisceart.
Beirt go dtí seo atá tar éis bháis sa tír.
I gcás 80% de na daoine a fhaigheann Covid-19, tinneas nach mbíonn an-dian atá i gceist. Bíonn an galar níos tromchúisí i gcás 14%. Tá baol mór ag baint le 6% de na cásanna.
Tá an Príomhoifigeach Leighis, an Dr. Tony Holohan, ag moladh go tréan do dhaoine gan cóisir ná cruinniú mór a eagrú i dtithe daoine ná in aon láthair eile le Féile na nGael a cheiliúradh anocht agus amárach.
