Tá an aerlíne Aer Árann, atá lonnaithe in Aerfort na Mine i gCo na Gaillimhe, ceannaithe ag an bpíolóta príobháideach Jarlath Conneely.
Tá aithne mhaith ar Jarlath Conneely i measc an phobail eitilte mar go bhfuil 35 bliain caite aige ina phíolóta. Tá sé ina bhall de Chlub Eitleoireachta na Gaillimhe agus is as Bóthar na Trá i nGaillimh ó dhúchas é.
Bhí sé ag obair do Eircom tráth, agus bhí sé ina bhainisteoir ar chomhlachtaí eile i nGaillimh go dtí go ndeachaigh sé ar scor sa bhliain 2008.
Shínigh Jarlath Conneely agus úinéir Aer Árann an Seanadóir Pádraig Ó Céidigh conarthaí ar maidin.
Jarlath Conneely
Tá conradh i bhfeidhm idir Aer Árann agus Roinn na Gaeltachta go deireadh na míosa seo le seirbhís aeir a chur ar fáil go hÁrainn.
Tuigtear go bhfuil an Roinn le tús a chur le próiseas tairisceana an tseachtain seo chugainn le comhlacht a aimsiú a choinneos an tseirbhís aeir sa siúl.
Cheannaigh Roinn na Gaeltachta aerstráice na Mine an mhí seo caite ar chostas €2.75 milliún.
Tá fáilte curtha ag Coiste Cosanta na Seirbhíse Aeir go hÁrainn roimh an scéala. Deir siad go bhfuil ceann de na spriocanna a bhí acu bainte amach anois - is é sin go mbeadh Aerfort na Mine i seilbh na Roinne.
Dúirt an Seanadóir Pádraig Ó Céidigh le Nuacht RTÉ/TG4 tráthnóna go bhfuil sé sásta go bhfuil comhlacht Aer Arann chun leanacht ar aghaidh.
