Stoitheadh crainn ó fhréamh agus rinneadh damáiste do roinnt foirgneamh mar gheall ar an stoirm a thuargain codanna d'iarthar na tíre i gcaitheamh na hoíche. I nGaillimh agus i Maigh Eo is mó a bhí caill ar an aimsir.
Bhí fuarlaigh thart ar Bhóthar na Trá agus áiteanna eile i gcathair na Gaillimhe agus tuairiscítear díobháil a bheith déanta do dheich bhfoirgneamh dá mbarr.
Milleadh roinnt carranna a bhí fágtha cois cladaigh i mBóthar na Trá nuair a bhí sé ina lán mara thart ar 10 chlog.
Tá cáineadh déanta ag Máistir Cuain na Gaillimhe faoina laghad fógra a tugadh faoin anfa.
Tarraingíodh ancaire an bháid lastais a théann go hÁrainn Saoirse na Mara agus bhí sí triomaithe taobh thoir den duga. Tá sí curtha ar snámh arís ó shin.
Bhí cruinniú éigeandála ag na seirbhísí éigeandála sa chathair ar maidin agus bhí criúnna amuigh ón 5 a chlog ag glanadh an smionagair a d'fhág an stoirm ina diaidh.
Is i gCo Mhaigh Eo is láidre a bhí na siotaí agus bhí oibrithe Chomhairle Contae ansin amuigh ó mhoch maidine freisin ag glanadh smionagair de bhóithre.
Luas 117 ciliméadar san uair a bhí faoin ngaoth i gCnoc Mhuire, a deir Met Éireann.
I nDún na nGall, tuairiscítear 596 teach a bheith gan aon chumhacht abhléise ar inniu de bharr an doininn.
Bhí súil ag Bord Soláthair an Leictreachais go mbeadh an chumhacht ar ais faoi 2 a chlog inniu.
