Cuirfear leagan Gaeilge de chúntóirí gutha digiteacha mar Alexa agus Siri ar fáil, má bhíonn rath ar phleananna ríomheolaí i Missouri Mheiriceá i gcomhar le hAcadamh na hOllscolaíochta Gaeilge.
Tá scoláireacht bronnta ag Rialtas na Stát Aontaithe ar an Ollamh Caoimhín Ó Scanaill (nó Kevin Scannell) ó Ollscoil Saint Louis i Missouri le sé mhí a chaitheamh ag forbairt acmhainní bogearraí i nGaeilge in ionad an Acadaimh i gCarna i gConamara.
Tá aithne mhór ag aos na ríomhaireachta agus na meán sóisialta Gaeilge ar an Ollamh Ó Scanaill, Gael-Mheiriceánach de bhunadh Bhostúin.
Bhí baint nach beag ag an ríomheolaí le comhéadan Gaeilge a fhorbairt do phacáistí ríomhaireachta agus do dheisíní aitheanta - leithéidí Twitter, WhatsApp, Gmail, Skype, agus Mozilla Firefox.
Ach is é an plean atá aige macasamhail de na cúntóirí gutha Siri agus Alexa a chruthú i nGaeilge is mó atá ag tarraingt aird ó d'fhógair Fondúireacht Fulbright i Meiriceá go bhfuil scoláireacht bronnta ar an Ollamh Ó Scanaill le sé mhí a chaitheamh in Éirinn.
Chomh maith le bogearraí a fhorbairt le linn a sheala in Éirinn, beidh an Scanallach ag eagrú ceardlanna i measc an phobail agus ag tabhairt aoi-léachtaí do mhic léinn triú leibhéal sna réimsí aistriúcháin, cumarsáide agus Gaeilge féin.
FÍSEÁN Cén t-ainm Gaeilge a thabharfas muid ar Siri agus Alexa? Cúpla moladh ag Sorcha Ní Mhonacháin. pic.twitter.com/uLlYY011ve
— Nuacht RTÉ (@NuachtRTE) 13 June 2019
