Tá Gardaí in iarthar na tíre ag iarraidh ar úinéirí carranna a bheith ar a n-airdeall mar go bhfuil páirt luachmhar á goid astu sa réigiún. 

An tiontaire catalaíoch as carranna den déanamh Toyota Prius is mó, is cosúil, a bhfuil gadaithe sa tóir orthu. 

D’fhág Eileen Seoighe a Prius féin i gcarrchlós i Maigh Cuilinn i gCo na Gaillimhe Dé hAoine seo caite fad is a bhí sí ag siopadóireacht. Bhí sí imithe ar feadh leathuair agus nuair a tháinig sí ar ais ní thosódh a carr.

Bhí an tiontaire catalaíoch atá suite faoin gcarr goidte. 

Eileen Seoighe

Chuir sé ionadh ar Eileen mar gur tharla an ghoid i rith an lae agus go raibh an oiread daoine thart. 

Tá méadú ar líon na dtiontairí catalaíocha atá á ngoid mar go bhfuil na miotail iontu luachmhar.

Deir an meicneoir Blake Moore ó Moore Motors in Indreabhán i gCo na Gaillimhe go bhfuil sé éasca ag gadaithe na tiontairí a ghoid agus go bhfuil tóir orthu de bharr go bhfuil miotail cosúil le platanam agus tíotáiniam iontu.

Blake Moore, meicneoir in Indreabhán, Cois Fharraige

Lena gcarranna a chosaint, molann na Gardaí do dhaoine glas nó teanntán a chur ar an tiontaire catalaíoch. 

I ráiteas a eisíodh tráthnóna, deir Toyota gur fadhb í seo a bhaineann le carranna Prius a rinneadh roimh an mbliain 2010. Deir siad nach féidir na tiontairí a ghoid ó charranna a rinneadh ina dhiaidh sin.