Dúirt an Taoiseach Leo Varadkar tráthnóna go gcuirfeadh aon athbhreithniú ar an dréacht-shócrú ar dhealú na Breataine ón Aontas Eorpach an comhaontú sin ó mhaith.
Dúirt sé dá ndéanfaí aon athrú ar an dréacht-shocrú go bhféadfadh sé ar fad titim as a chéile.
Nuair a bheas mionstaidéar déanta ag feisirí parlaiminte na Breataine ar an socrú, a dúirt sé, b'fhéidir go dtacódh tuilleadh díobh leis.
Mhaígh sé gurb é an margadh atá molta an t-aon bhealach le teorainn chrua sa tír seo a sheachaint.
Dúirt an Taoiseach freisin go mbeadh cúrsaí ina gcíor thuathail mura mbeadh aon mhargadh ann, agus go dtiocfadh rialacha agus treoracha na hEagraíochta Domhanda Trádála i bhfeidhm.
Tráthnóna, d'fhógair Príomh-Aire na Breataine Theresa May go bhfuil duine nua - Steve Barclay - ceaptha ina Aire Breatimeachta aici tar éis do Dominic Raab éirí as an bpost sin inné.
