Deir comhlacht ón mBreatain go gcuirfidh siad dlús lena gcuid iarrachtaí gás a tharraingt as trí shuíomh atá aimsithe acu san fharraige amach ó chósta Mhaigh Eo.
Measann an comhlacht Europa Oil & Gas gur dhá thrilliún troigh chiúbach de ghás atá sna suímh. Sin dhá oiread an mhéid atá i dTobar Gáis na Coiribe nach bhfuil ach 16 ciliméadar soir ó dheas ó na suímh gháis nua seo.
Deir Europa gur cheart go mbeidís in ann tobar taiscéalach a thochailt faoin mbliain 2020 ach an cead cuí a fháil ón Rialtas i dtosach.
Bheadh súil acu freisin, a deir siad, go bhfaighidís cead leas a bhaint as bonneagar Thobar Gáis na Coiribe leis an ngás a phróiseáil.
Deir an comhlacht chomh maith gur in uisce éadomhain atá an gás agus gur furasta agus gur saoire é a thabhairt i dtír dá bharr sin.
