Tabharfaidh 30 spéirbhean as an 64 atá san iomaíocht do Rós Thrá Lí na bliana seo, maraon lena ngiollaí, cuairt ar Chorca Dhuibhne i gCo.Chiarraí inniu.
Tá sé i gceist acu dul amach chomh fada leis an deilf Fungi níos deireanaí.
I measc na n-áiteanna a bhfuil siad ag tabhairt turais orthu tá Ionad an Bhlascaoid Mhóir i nDún Chaoin mar a bhfaighidh siad turas treoraithe timpeall an Ionaid.
Tá Potadóireacht Louis Uí Mhaolchatha i gClochar ar an liosta dóibh freisin.
Tar éis lón a chaitheamh in Óstán na Sceilge, roinnfear i 2 ghrúpa iad.
Tabharfaidh grúpa amháin acu turas ar Mhara Beo agus rachaidh an grúpa eile amach ar bhád chomh fada le Fungi.
Dé Máirt seo chugainn, in Ionad an Dome i dTrá Lí a roghnófar Rós na bliana seo.
Is é Dáithí Ó Sé, cé eile ar ndóigh, a bheas ag láithriú na féile.
