Tá corp Mhartin McGuinness ar a bhealach chuig reilig Chathair Dhoire anois tar éis Aifreann na Marbh i Séipéal Naomh Cholumba ar an Túr Fada sa chathair.
Níos luaithe tugadh a chorp óna theach cónaithe chuig an séipéal mar a raibh an sagart áitiúil an tAth. Michael Canny i mbun na ndeasghnátha.
Bhí a bhean chéile Beirní, maraon le hUachtarán Shinn Féin, Gerry Adams, ar na daoine a rinne seal ar an gcónra a iompar.
Labhair an t-iar-Uachtarán Bill Clinton i rith an Aifrinn agus tabharfaidh Gerry Adams an óráid cois na huaighe.
Dúirt Bill Clinton gurb é an bealach cuí le hómós a thabhairt d'oidhreacht Mhartin McGuinness é an obair a thosaigh sé a thabhairt i gcrích.
Bhí an tUachtarán Michael D Higgins agus an Taoiseach Enda Kenny i láthair ann freisin, maraon le hArlene Foster, iar-Chéad Aire Thuaisceart Éireann, agus an t-iar-Phríomh-Aire Tony Blair. Tugadh bualadh bos d'Arlene Foster nuair a tháinig sí isteach ina suíochán sa séipéal.
Chuir Easpag Dhoire Donal MdKeown fáilte roimh an réimse leathan daoine ó gach traidisiún in Éirinn atá bailithe ag an Aifreann.
Leanfaidh an tsochraid cuid mhaith de chúrsa na máirseála cearta daonna ar Dhomhnach na Fola i 1972.
Tá na mílte bailithe ar gach aon taobh den bhóthar mar a mbeidh an tsochraid ag déanamh a bhealaigh chuig an reilig.
