Rialaigh an Chúirt Eorpach um Chearta an Duine nach raibh an cás sibhialta a tugadh in aghaidh bheirt fhear faoi bhumáil na hÓmaí éagórach.
Ghearáin an bheirt fhear - Michael McKevitt agus Liam Campbell - faoi cháilíocht na fianaise ina n-aghaidh. I measc na ngearán a rinne siad, mhaíodar nár chóir glacadh le fianaise ó ghníomhaire de chuid an FBI mar nach raibh sé sa chúirt le ceisteanna a fhreagairt.
Maraíodh 29 duine - bean a bhí ag súil le cúpla ina measc - nuair a phléasc buama i ngluaisteán san Ómaigh ar 15 Lúnasa 1998. Ba é an Fíor-IRA, mar a thugtar air, a bhí freagrach as an ionsaí.
Thug cuid de ghaolta na marbh cás sibhialta in aghaidh Michael McKevitt agus Liam Campbell. In 2009, rialaigh an chúirt i mBéal Feirste go raibh an bheirt fhear, chomh maith le beirt eile, freagrach as an mbuamáil. Ordaíodh dóibh damáistí cúitimh a íoc leis na gaolta.
Rialaigh an Chúirt Eorpach inniu nach raibh aon bhunús le gearán na beirte.
