Thug na Gardaí agus póilíní ón Spáinn faoi chuardaigh i mBaile Átha Cliath agus sa Spáinn mar chuid d'fhiosrúchán faoi bhuíon coirpeach Kinahan.
Tá na Gardaí agus póilíní ón Spáinn ag comhoibriú le chéile ó dúnmharaíodh David Byrne in óstán an Regency i mí Feabhra.
Gabhadh fear sna tríochaidí sa Spáinn agus táthar á choinneáil maidir le dúnmharú Gary Hutch as Baile Átha Cliath a lámhachadh agus a maraíodh ag a árasán cóngarach de Marbella.
Tá aithne ag na Gardaí ar an té a gabhadh.
Tuairiscítear go dtabharfar os comhair cúirte sa Spáinn é faoi cheann cúpla lá.
Breis is 60 Garda a bhí i mbun cuardaithe i 6 áit ar leith i mBaile Átha Cliath d'fhianaise a bhaineann le coiriúlacht eagraithe.
Cuardaíodh cúig áit ar an Costa Del Sol, áit a bhfuil muintir Kinahan lonnaithe, luath ar maidin chomh maith.
Bhí póilíní ón Spáinn in éineacht leis na Gardaí i mBaile Átha Cliath agus bhí bleachtairí ón Aonad um Choireacht Eagraithe agus Drugaí i gcuideachta na bpóilíní sa Spáinn.
Cuardaíodh láithreacha i dTamhlacht, i gCluain Dolcáin, i gCromghlinn agus i lár na cathrach.
Gabhadh ráitis bhainc, leabhair bhainc, eolas a bhaineann le cúrsaí airgeadais agus €10,000 airgead tirim.
Ba é Gary Hutch an chéad duine a dúnmharaíodh san aighneas idir buíonta coirpeach Hutch agus Kinahan.
Maraíodh seachtar eile ina dhiaidh sin.
