Tá os cionn 150 duine ag glacadh páirte sa chuardach in iarthar Chorcaí féachaint le teacht ar chorp Bharry Davis Ryan a báthadh ansin an tseachtain seo caite.
Báthadh Barry Davis Ryan, 20 bliain d'aois, chomh maith lena pháirtí Niamh O'Connor agus a athair Barry Ryan nuair a scuab maidhm chun bealaigh iad i nDún na Séad naoi lá ó shin. Fuarthas coirp na beirte eile agus adhlacadh iad an deireadh seachtaine seo caite.
Rinne aonad cuardaigh fo-uisce agus tarrthála iarthar Chorcaí achainí náisiúnta ar thumadóirí oilte a teacht go hiarthar Chorcaí inniu agus amárach le cuidiú leo corp Bharry Davis Ryan a aimsiú.
Cé go bhfuiltear ag leanacht den chuardach gach lá, ní rabhthas in ann tumadóireacht a dhéanamh ach ar chúig lá de bharr na drochaimsire.
Tá daoine áitiúla ag cur lóistín agus sóláistí ar fáil do na tumadóirí atá bailithe ar an mbaile inniu.
