I gcúirt i mBostún sna Stáit Aontaithe, leanadh le triail Dzhokhar Tsarnaev, an fear 21 bliain d'aois atá cúisithe i mbuamaí a leagan ag maratón na cathrach i mí Aibreáin 2013.
Thug fear a chaill a dhá chois sa bhuamáil fianaise inniu. Dúirt sé gur theagmhaigh sé le duine de dheartháireacha Tsarnaev sular tharla an chéad phléasc.
Póilín de bhunadh na hÉireann - Joseph Reynolds - an chéad duine a chonaic Tamerlan agus Dzhokar Tsarnaev agus iad ar a dteitheadh i Watertown in iarthuaisceart Bhostúin trí lá i ndiaidh na buamála.
B'as Béal an Daingin i gConamara seanmháthair agus seanathair Joseph Reynolds, agus as an mBóthar Mór i nGaillimh a mháthair.
