D'fhógair an Pápa Proinsias gur mairtíreach is ea an tArdeaspag Oscar Romero a feallmharaíodh in El Salvador 35 bliain ó shin agus go mbeannófar é amach anseo. Dúirt an Pápa gur laoch é Oscar Romero don Eaglais Chaitliceach i Meiriceá Láir agus Theas.
Lámhachadh an tArdeaspag agus Aifreann á cheiliúradh aige i séipéal ospidéil i mí an Mhárta 1980. Buíon fear a raibh baint acu le hArm El Salvador a chreidtear a bhí freagrach as an bhfeallmharú.
Meastar gur mharaigh siad é mar gur cháin sé go minic an leatrom a bhí á imirt ag Rialtas El Salvador ar mhuintir na tíre.
Bhí 250,000 i láthair ag a shochraid, ceannairí eaglasta ón tír seo ina measc. Scaoil buíon fear leis an slua ag an tsochraid freisin agus maraíodh suas le leathchéad.
