Beidh Pé Scéal É, arna chur i láthair ag Máire Treasa Ní Dhubhghaill beo ó Choláiste na hOllscoile Corcaigh Dé hAoine beag seo, an 6ú Feabhra ag 3 i.n ar RTÉ Raidió na Gaeltachta.
Beidh duaiseanna breátha le buachan ar an gclár - beidh dhá thicéad do cheolchoirm Jason Derulo sa 3Arena le bronnadh ar éisteoir amháin, agus bronnfar dearbhán don óstán The River Lee i gCorcaigh le dinnéar, leaba agus bricfeasta ar éisteoir ádhúil eile.
Beidh scoth an cheoil bheo, comhrá agus craic le mic léinn na hollscoile le cloisteáil.
Labhróidh ionadaithe ó Chumann Ceoil na hOllscoile le Máire Treasa faoi Tradfest UCC, a bheidh ar siúl an deireadh seachtaine seo, faoi na ceolchoirmeacha, seisiúin cheoil, agus na himeachtaí ar fad atá eagraithe acu don fhéile.
Tabharfaidh Lúcas Ó Raghallaigh, Oifigeach Gaeilge Aontas na Mac Léinn i gColáiste na hOllscoile Corcaigh, léargas ar Oireachtas na Mac Léinn, a thionólfar san ollscoil an deireadh seachtaine seo chomh maith, le mic léinn ó chuile chearn den tír seo, ón mBreatain Bheag agus Albain ag triall ar Chorcaigh don ócáid.
Beidh baill den Chumann Dodgeball agus den Chumann Cniotála agus Cróiseála i mbun cainte le Máire Treasa chomh maith.
Tá fearadh na fáilte roimh éisteoirí i gCorcaigh buaileadh isteach, nó tugaigí cluas le héisteacht dóibh!
Beidh Pé Scéal É, beo ó Choláiste na hOllscoile Corcaigh ar RTÉ Raidió na Gaeltachta, Dé hAoine 6 Feabhra ó 3 i.n.
