Doireann Ní Ghlacáin & Dáithí Ó Sé ar Bhóthar na bhFál agus iad ag déanamh a mbealaigh go dtí Cultúrlann McAdam Ó Fiaich do chóisir mhór Oíche Chinn Bliana, Fáilte 2025, a bheidh á chraoladh ar TG4.
Is ar Chultúrlann McAdam Ó Fiaich i mBéal Feirste a bheidh Dáithí Ó Sé agus Doireann Ní Ghlacáin ag triall chun teacht na bliana úire 2025 a cheiliúradh. Tá cóisir mhór cheoil beartaithe acu sa Cheathrú Gaeltachta ar Bhóthar na bhFál agus ina gcomhluadar beidh plúr na gceoltóirí agus amhránaithe.
Chomh maith leis sin, beidh scoth an cheoil ag teacht chugainn ón Cobblestone i mBaile Átha Cliath áit a mbeidh Fiachna Ó Braonáin ina fhear an tí agus ó Tigh Chualáin i gCois Fharraige i gCo. na Gaillimhe áit a mbeidh Síle Seoige ina bean an tí.
I lár stáitse sa Chultúrlann beidh Moya Brennan agus a Banna, Piaras Ó Lorcáin agus Bláithín Mhic Cana, Ríoghnach Connolly le Alison Crossey agus scoth an cheoil ó Bhéal Feirste le John McSherry, Francie McIlduff agus Brendan Quinn.
I mbun an cheoil sa Cobblestone i mBaile Átha Cliath beidh Meave Mulligan le Andrew Hendy ó na Marywallopers, Liam O'Connor, Libby McCrohan agus Paddy McEvoy, agus Aoife Scott.
I measc na gceoltóirí a bheidh in éineacht le Síle Seoige Tigh Chualáin in Indreabhán, Co. na Gaillimhe beidh Na Fíréin, atá ag ceiliúradh 40 bliain ar an bhfód, Róisín Seoige & IMLÉ mar aon leis na ceoltóirí Conor Connolly, Sorcha Costello agus Pádraig Ó Dubhghaill.
Ná caill an chóisir cheoil is fearr sa tír ón 11.30pm Oíche Chinn Bliana ar TG4.
