Fiosróidh Úna Monaghan, trína saothar ceoil féin, na deiseanna a thagann chun cinn nuair a dhéantar smaointe nua a chónascadh leis an gceol traidisiúnta, deiseanna a sháraíonn na rialacha.
San fhadchlár faisnéise nua seo, leanfar an cruitire, an cumadóir agus an t-innealtóir fuaime fad a bheidh sí i mbun a halbam nua trialach, Aonaracht, a thaifeadadh.
Tá blianta fada caite ag Úna ag obair san eolaíocht agus sna healaíona, an méid a bhíonn i bpáirt ag ceol traidisiúnta na hÉireann, ag an gceol trialach, ag an tobchumadóireacht agus ag an teicneolaíocht idirghníomhach á scrúdú aici. D'imir saothar John Cage tionchar ar Úna agus tá clú bainte amach aici sa seánra céanna.
Tá Aonaracht ar cheann de na tograí is uaillmhianaí dá cuid go dtí seo agus tá uirthi a chur ina luí ar shárcheoltóirí traidisiúnta eile muinín a bheith acu inti agus sa seánra atá sí a chur chun cinn lena cur chuige ceannródaíoch: ag taifeadadh albam d'aonréid ag baint leas as uirlisí leictreonacha.
Tá sí ag tabhairt faoi seo go léir fad a dtugann sí faoi thogra nua eile - ag tógáil clainne.
Tá an iomaí brí a bhaintear as an bhfocal Aonaracht (a bheith asat féin, aon ní amháin) le braith san fhadchlár faisnéise, ó na haonréid a chumann Úna do na ceoltóirí go dtí an chaoi a ndíríonn sí go hiomlán ar na saothair cheoil.
Tá codarsnacht le brath freisin mar gheall ar an gcur chuige comhoibríoch atá i gceist le halbam dá leithéid a léiriú agus mar gheall ar an gcomhpháirtíocht ealaíne atá ag Úna lena máthair féin, an dealbhóir Nóirín Nic Alastair. De réir mar a fhaigheann Úna faoi réir le fáilte a chur roimh a céad pháiste tá ceist amháin ar a hintinn - an mbeidh sí in ann an dá thrá a fhreastal - Clann a thógáil fad a dtugann sí faoin uaillmhian ealaíne?
I measc na sárcheoltóirí agus amhránaithe traidisiúnta a ghlacfaidh páirt in Aonaracht beidh Pauline Scanlon, Paddy Glackin, Iarla Ó Lionáird, Jack Talty, Saileog Ní Cheannabháin agus Tiarnán Ó Duinnchinn.
Déanfar an próiseas a bhíonn i gceist le halbam a dhéanamh ó thús deireadh a fhiosrú san fhadclár faisnéise seo, an iomaí dúshlán a bhíonn i gceist, an féinamhras agus na hathruithe móra a tharlaíonn sa saol agus an choimhlint a bhíonn i gceist dóibhsean a chuireann iad féin in iúl trí mheán na n-ealaíon fad a dtógann siad clann.
DoubleBand Films a léirigh Aonaracht don BBC Gaeilge agus do TG4 le maoiniú ó Ciste Craoltóireachta Gaeilge Scáileán Thuaisceart Éireann.
Craolfar Aonaracht Dé Céadaoin, an 5 Meitheamh ag 21:30 ar TG4 agus TG4.ie.
