Cailleadh an ceoltóir, fear pobail agus ealaíontóir agus fear gnímh, Feargal Mac Amhlaoibh aimsir na Nollag. Craoladh clár speisialta de chuid An Saol Ó Dheas ar RTÉ Raidió na Gaeltachta in ómós dó agus an oidhreacht a d'fhág sé ina dhiaidh.
Clár speisialta i gcuimhne ar Fheargal Mac Amhlaoibh a fuair cuireadh na Nollag Lá an Dreoilín. Chaith Feargal a shaol go dícheallach a plé le forbairt pobail i gceantracha éagsúla Gaeltachta. Ba as Baile Átha Cliath ó dhúchas d'Fheargal ach chaith sé go leor ama i gceantair Ghaeltachta éagsúla ó Oileán Chléire, ar Árainn agus ar deireadh i nDún Chaoin, i gCorca Dhuibhne.
Tá giotaí de chaint Fheargail sa chlár agus é ag caint ar a óige ag fás aníos i mBaile Átha Cliath agus an spéis a d'fhorbair ann sa Ghaeilge agus cúrsaí cultúrtha na tíre seo. Labhair Feargal faoin tionchar a bhí ag an nGaeilge agus ag an gceol air agus é ina fhear óg ar cuairt go Corca Dhuibhne.
Dár ndóigh, bhog Feargal go Dún Chaoin agus is ann a thóg sé féin agus a bhean chéile, an t-aisteoir, Áine Moynihan beirt chlainne, Malachí agus Muireann.
