D'fhógair An tOireachtas go bhfuil siad ag tacú le breis agus tríocha imeacht Gaeilge i seacht chontae déag ar fud na tíre ar Oíche Chultúir 2022.
Tá éagsúlacht iontach sna himeachtaí a bheas ar siúl: ceol traidisiúnta; snagcheoil; damhsa ar an sean-nós; céilí; taispeántas ealaíne; turas treoraithe agus neart eile!
Ag filleadh don seachtú bliain déag, tionólfar Oíche Chultúir Dé hAoine, 23 Meán Fómhair 2022. Is é buaicphointe na hoíche don Oireachtas ná go mbeidh Pólca 4 agus aíonna speisialta: buaiteoir reatha Steip Ruadhán Ó Flatharta agus an t-amhránaí clúiteach, Caitríona Ní Cheannabháin i lár stáitse i gCearnóg Theach an Tionóil, Barra an Teampaill, Baile Átha Cliath ó 7.30 p.m.
Beidh oíche lán le ceol, craic, damhsa agus amhránaíocht chun pobal na Gaeilge i mBaile Átha Cliath a thabhairt le chéile don ócáid speisialta seo.
Murar féidir leat freastal ar na himeachtaí seo tá go leor leor ag tarlú ar líne agus ar an teilifís, ón gclár ealaíona a bheas ar TG4 ag tosú ag 10pm go clár speisialta a bheidh á chraoladh ó Loch Boora ar RTÉ ONE ag 7pm. I measc na n-aíonna a bheidh ann, beidh Tolϋ Makay, Felispeaks, Damien Dempsey, Jack O'Rourke, Martin Hayes, Elaine Mai, Maykay, Loah, Ailbhe Reddy and Sinead White.
Tá gach eolas faoi mhór-imeacht an Oireachtais agus gach imeacht Gaeilge eile ar Oíche Chultúir ar fáil ag www.antoireachtas.ie/oiche-chultuir-2022/
